صبح صادق

برطانیہ معتدل ملک نہیں ہے، اور رسالہ شروع ہی میں بتاتا ہے کہ اِس کی قیمت کیا ہے۔ یہاں دن ساڑھے سولہ گھنٹے کا ہو جاتا ہے اور رات ساڑھے سات گھنٹے کی، اور پھر اُلٹا۔ گرمی کے عروج میں بارہ ڈگری پر عشاء کا وقت ساڑھے بارہ بجے رات کو آتا ہے اور صبح صادق ایک بج کر سوا منٹ پر، تو عشاء اپنے اصلی وقت پر پڑھنا انتہائی مشکل ہے اور اُس کے ایک گھنٹے بعد سحری کے لئے اُٹھنا ہر ایک کے بس کی بات نہیں۔ صبح صادق بتیس صفحوں میں یہی بتاتی ہے کہ اِس کا کیا کیا جائے۔

اُن کے جواب کے دو حصے ہیں۔ جن مہینوں میں اٹھارہ ڈگری پر بغیر حرج کے عمل ہو سکتا ہے، اُن میں اٹھارہ ڈگری پر عمل کریں: جدولیں جو ہیں سو ہیں، اور وہ تصویریں دے کر دکھاتے ہیں کہ اِس عرض بلد پر صبح صادق اٹھارہ ڈگری پر ہوتی ہے، اُس سے پہلے نہیں۔ گرمی کے مہینوں میں، مارچ کے آخر میں گھڑی بدلنے کے وقت سے، ہر روز ایک دو منٹ کم کرتے جائیں، پونے گیارہ بجے اذان دلوائیں اور گیارہ بجے تک عشاء پڑھ لیں، اُس سے زیادہ تاخیر نہ کریں۔ اور یہ سب، وہ کہتے ہیں، حرج ہی کی بنیاد پر کیا جائے۔

صبح صادق کے لئے وہ وقت ٹھہرانے کی دو صورتیں بیان کرتے ہیں۔ اعدل الایام میں مارچ کے آخر سے فارمولے پر عمل کیا جاتا ہے۔ اقرب الایام میں آخری اصلی صبح صادق کو تھام لیا جاتا ہے: لندن میں وہ ۲۲ مئی کو ایک بج کر پندرہ منٹ ہے، تو سوا ایک سے پہلے سحری کر لیں اور اُس کے بعد فجر پڑھ لیں، اور یہی ۲۱ جولائی تک رہے۔ دونوں پر عمل ہو سکتا ہے؛ وہ دونوں بیان کرتے ہیں، پڑھنے والے کے لئے خود انتخاب نہیں کرتے۔

فلکی حساب ایچ ایم نوٹیکل الماناک آفس کی ٹائم ٹیبلوں سے لیا گیا ہے، جن میں شہر کا اپنا طول بلد اور عرض بلد ڈالا جاتا ہے، اور اُن تصویروں سے جو اُنہوں نے گوگل امیجز سے لیں۔ آخر میں آفس کا پتہ بھی دے دیا ہے تاکہ کوئی بھی اپنے شہر کے لئے خود پوچھ سکے۔

آخر میں وہ یہ لکھتے ہیں کہ کتاب کیا نہیں ہے۔ ”میں مفتی نہیں ہوں اِس لئے فتویٰ نہیں دے سکتا۔ یہ تو فلکی و اسٹرونومیکل اعتبار سے کچھ چیزیں ملی ہیں، اُن کو پیش کیا ہے، اور اُس کی مناسبت سے حدیث سے پیش کی ہے۔ دوسرے مفتیانِ کرام سے پوچھ لیں۔ اور اگر مناسب سمجھیں تو مسجد والے مل کر فیصلہ کر لیں۔“ مانچسٹر، ۲۵ اگست ۲۰۲۱ء۔

اِسی مسئلے کا چاند والا رُخ اتحادِ مطلع ہے، اور آنے والے پندرہ سال کے اوقات انگلینڈ کے کیلنڈر میں ہیں۔

ناشر: مکتبہ ثمیر، مانچسٹر، انگلینڈ۔